અધધધ પગાર વધારા મારે સાંસદોએ તાયફો કર્યા બાદ જયારે સંસદમાં સાંસદોના પગાર વધારા માટે ત્રાગડો રચાયો ત્યારે અનેક કોંગ્રેસીઓ અને અનેક દેશવાસીઓ જેને ભાવી વડા પ્રધાનના રૂપમાં જુએ છે તે યુથ આયકોન રાહુલ રાજીવ ગાંધી પબ્લિક રીલેશનના કામમાં પડ્યા હતા, દેશની જનતાના હાલચાલ પૂછવા નીકળ્યા હતા. દેશના અનેક લોકો જયારે સાંસદોના બેફામ પગાર વધારા સામે (પણ) નારાજ હતા ત્યારે અને લોકોમાં આ મુદ્દે રોષ અને નારાજગી (કંઈ ના કરી શકવાની લાચારી પણ) હતી ત્યારે અમેઠીના યુવા સાંસદ (જેની પાસે અનેક લોકોને અપેક્ષા હતી અને હજુ છે ) તેનું કોઈ નોંધપાત્ર નિવેદન ના આવ્યું. ગયા વર્ષે મોંઘવારી અને મંદી વચ્ચે સોનિયાજી એ તમામ સાંસદોને સાદગીને અપીલ કરી હતી, પ્લેનના ઈકોનોમી ક્લાસમાં મુસાફરી કરવા કહ્યું હતું. સોનિયાજીના અને રાહુલના શબ્દને સુચના અને આદેશ માનનારા અનેક કોંગ્રેસીઓએ આ અપીલનું પાલન પણ "કરી દેખાડ્યું." બાદમાં મંદી પૂરી થઇને સાદગી અને કરકસરની વાત વિસરાઈ ગયી. હવે જયારે લાલુ, મુલાયમ (ખરેખર મુલાયમ નહિ પણ જાડી ચામડી છે) જેવા બાહુબલી સાંસદો એ પગાર વધારા માટે હલ્લો અને હોબાળો મચાવ્યો ત્યારે અમેઠીના યુવા સાંસદે આ મુદ્દે પોતાનું વલણ સ્પષ્ટ કરવાની અને દેશવાસીઓની લાગણીને ખરી રીતે ધ્યાનમાં રાખીને સંસદમાં સાંસદોના પગાર વધારાનો વિરોધ કરીને ખરેખર સાદગીનો પક્ષ રાખવાની જરૂર હતી. પણ માતા સોનિયાજીએ સાંસદોના પગાર વધારાને સમર્થ આપ્યું અને જો રાહુલ બાબા વિરોધ કરે તો જે સાથી પક્ષો યુપીએને ટેકો આપી રહ્યા છે, તે નારાજ થઇ જાય અને કેન્દ્રમાં શાસન કરતી કોંગ્રેસની સત્તા હાલક-ડોલક થઇ જાય. એટલે સળગતા મુદ્દાઓ બાબતે મૌન રાખીને (જ્યાં ખરેખર બોલવાની જરૂર છે) દેશવાસીઓની મુલાકાત લીધા કરવાની અને ફરિયાદો સાંભળી તેને હાલ કરવાની સુચના આપ્યા કરવાની. ખોટા (ખરેખર તો સાચા) વિવાદ અને વિરોધમાં નહિ પડવાનું. વડા પ્રધાન બનવા માટે દેશના લોકોને મળીને ખાલી ચોકલેટી બનવાથી નહિ ચાલે, રાહુલ તમારે તમારા દાદી ઇન્દિરાજી અને પિતા રાજીવ જેવી આક્રમકતા પણ દેખાડવી પડશે. કારણ વડા પ્રધાન બન્યા પછી આસપાસ તો હજુરિયા-ખજુરીયા હશે, પણ દેશની સામે અનેક દુશ્મનો પણ હશે. પબ્લિક રીલેશનની સ્ટંટબાજી ને બદલે ભાવી વડા પ્રધાનને સળગતા પ્રશ્નો, લોકોને ખરી રીતે સ્પર્શતા મુદ્દાઓની સમજ, પરખ અને સાથે સંવેદનશીલતા હોવી જરૂરી છે અને યુવા નેતા આ મુદ્દા ને પ્રાથમિકતા આપે અને તેના ઉકેલ માટે આક્રમકતા અને તત્પરતા દાખવે તે જરૂરી છે. રાહુલ હજુ ઘણું શીખવાનું બાકી છે, મુદ્દાઓ, પ્રશ્નો અનેક છે અને આવશે. જોઈએ છે સમય શું કહે છે.
